විනාඩි 30ක් පමණ සුළු වේලාවකින් සාදාගත හැකි මේ ෂුගර් කුකීස් ඔබට කැමති ආකාරයට අලංකාර කරගන්නත් තවත් රසවත් කරගන්නත් ඔබට පුළුවන්. ඉතාම සරලව උඩින් සීනි ටිකක් ඉසගන්නත්, කජු, ආමන්ඩ් වැනි යමක් පොඩියට කපා එකතු කරන්නත්, නැතිනම් වියළ් මිදි හෝ පළතුරු කැබලි වැනි දේවල් එකතු කරගන්නත් ඔබට නිදහස තිබෙනවා. බලන්නකෝ එහෙනම් හදන විදිහ..
- බටර් 100g (ලුණු සහිත)
- සීනි 100g
- බිත්තර 1
- පාන් පිටි 150g
- බේකිං පවුඩර් තේ හැඳි 1
- වැනිලා තේ හැඳි 1
සාදාගන්නා ආකාරය:
- මුලින්ම අවන් එකේ උෂ්ණත්වය සෙල්සියස් 190ක් (ෆැරන්හයිඩ් 375 ක්) ලෙස සකස් කර අවන් එක රත් වෙන්නට හරින්න.
- ඉන්පසු භාජනයකට සීනි සහ බටර් දමා හොඳින් සීනි දියවන තුරු විනාඩි 2, 3ක් හොඳින් බීට් කරන්න.
- පිටි වලට බේකින් පවුඩර් දමා හොඳින් කළවම් කරන්න.
- බේකින් පවුඩර් සමඟ මිශ්‍ර කරගත් පිටි, බිත්තරය සහ වැනිලා බටර් මිශ්‍රණයට එකතු කරන්න.
- එම මිශ්‍රණය පිටි බෝලයක් ලෙස එන තෙක් විනාඩි 2,3ක් හොඳින් කලවම් කරන්න.
- ගැඹුර අඩු දිග වැඩි බේකින් තැටියක් ගන්න.
- එයට තෙල් කඩදාසියක් දමන්න (නැතහොත් හොඳින් බටර් තවරන්න).
- බිස්කට් මිශ්‍රණයෙන් කුඩා කොටස් ගෙන අතින් කුඩා බෝල සාදා බේකින් තැටිය මත තබන්න.
- බේක් වන විට බිස්කට් බෝල පැතලි වී බිස්කට් හැඩය ගන්නා නිසා තැටියට බෝල තබන විට එම බෝල අතර ප්‍රමාණවත් ඉඩක් තිබෙන්න හරින්න. (මේ මිශ්‍රණය බිස්කට් බෝල 12 කට ප්‍රමාණවත්)
- දැන් බේකින් තැටිය අවන් එක තුළට දමා ලා දුඹුරු පැහැවන තෙක් විනාඩි 15–20 අතර කාලයක් බේක් කරගන්න.
- එච්චරයි! බේක් වෙලා ඉවර වුනහම කුකීස් ටික නිවෙන්න තියලා කෑමට ගන්න පුලුවන්.
වැදගත්:
- හොඳින් බේක් වුණු ෂුගර් කුකීස් හොඳින් නිවී සිසිල් වුණු පසු, සුළං නොවදින බඳුනක දමා කාමර උෂ්ණත්වයේ සතියක් දක්වා නැවුම්ව කල් තබා ගත හැකියි.
පොටෝ ටිකත් බලන්නකෝ..
මේ මිශ්‍රණය හදාගන්න කොට.
බේකින් තැටියක් ඇරගෙන ඒකට තෙල් කඩදාසියක් දාලා හරි නැත්නම් හොදට බටර් හරි තවරාගෙන මේ වගේ තැටිය සූදානම් කරගන්න.
මේ බේකින් තැටිය උඩින් බිස්කට් මිශ්‍රණයෙන් හදාගත්ත බෝල ටික තියාගෙන. බේක් වෙන කොට බිස්කට් බෝල පැතලි වී බිස්කට් හැඩය ගන්න හින්දා තැටිය උඩින් බෝල ටික තියන කොට ඒවා අතර ඉඩක් හිටින විදිහට තියන්න. මේ වගේ තියාගත්තනම් හරි.
මේ තියෙන්නෙ බේක් වුනාට පස්සෙ කුකීස් ටික. දැන් ඉතින් නිවුනට පස්සෙ කෑමට ගන්න තමයි තියෙන්නෙ.
මේ ලිපිය උපුටා ගැනීමක්. ලිපිය ලබාගත්තේ බර්නඩින් සහ සජානි කියන මිතුරියන් දෙදෙනාගේ thetastylove.com වෙබ් අඩවියෙන්. එයාලගේ ලිපි අපේ ඉවුම් පිහුම් කට්ටියට බලන්න ඇප් එකේ පළකරන්න අහපුවහම කිසිම අවුලක් නැතිව මිතුරියන් දෙදෙනා හා කිව්වා. ඔවුන්ට බොහොම ස්තූතියි! ඒ වගේම මොනවා හරි ගැටලුවක් මතුවුනොත් එයාලා හදපු මේ වීඩියෝ එකත් බලන්නකෝ.. (https://www.youtube.com/watch?v=oJxj8drraSQ)
