තිබ්බටු, එහෙමත් නැත්නම් තිබ්බොටු මැල්ලුමක් හදන විදිහ තමයි ඔන්න දැන් කියලා දෙන්න යන්නෙ. මේ මැල්ලුමට කොච්චි දාන්න පුලුවන්නම් තමයි ගොඩක්ම හොද. කොච්චි හොයාගන්න නැත්නම් අමු මිරිස් කරල් කිහිපයක් දාන්න. ඒ වගේම අන්තිමට බැද ගත්ත හාල්මැස්සෝ ටිකකුත් මේකට දාගන්න පුලුවන්නම් තවත් රසයි.
අවශ්‍ය දේවල්:
- තිබ්බටු 250g
- ගා ගත් පොල් කප් ¼ - ½ ක් පමණ
- රතු ලූණු ගෙඩි 6 - 7ක් පමණ
- කොච්චි කරල් 4 - 5ක් පමණ (අවශ්‍ය පරිදි අඩු වැඩි කර ගන්න.)
- කපා ගත් තක්කාලි ගෙඩි ½ ක් පමණ
- කහ කුඩු ස්වල්පයක්
- ගම්මිරිස් කුඩු ස්වල්පයක් (කැමති නම් පමණක්)
- රම්පේ
- කරපිංචා
- කුඩා ඉඟුරු කෑල්ලක්
- සුදුලූණු බික් 1- 2ක්
- ලුණු (රස අනුව)
සාදා ගන්නා ආකාරය:
- මුලින්ම පොල් ටිකට රතු ලූණු ටිකයි, කොච්චි ටිකයි, ගම්මිරිස් ටිකයි , ඉඟුරු ටිකයි, සුදුලූණු ටිකයි දාලා ගලේ අඹර ගෙන පොඩ්ඩකට පැත්තකින් තියන්න.
- පස්සේ තිබ්බටු වල නැටි අයින් කරලා සුද්ද කරන් හොදට හෝදලා ඇතිලියකට දාන්න. (ඕනේ නම් පොඩ්ඩක් තිබ්බටු ගෙඩිය පලා ගන්න පුළුවන්.)
- දැන් ඒකටම කහ කුඩු, ලුණු (රස අනුව), රම්පේ, කරපිංචා, තක්කාලි සහ තැම්බෙන්න ඕන කරන ගානට වතුර ටිකක් දාලා ලිපේ තියන්න.(ගොඩක් වතුර දාන්න එපා, නැත්තම් තිබ්බටු බෙරි වේවි.)
- ඊට පස්සේ තිබ්බටු තැම්බිලා වතුර හිදෙනකන්ම උයා ගන්න.
- ඊළඟට ඒකටම කලින් අඹර ගත්ත පොල් මිශ්‍රණය දාලා හොදට කලවම් කරලා අඩු ගින්දරේ මලව ගන්න.
- ඔන්න හදා ගෙන ඉවරයි, කලා බලන්න තමයි තියෙන්නේ.
වැදගත්:
- කැමති නම් ගැඹුරු තෙලේ බැද ගත්ත හාල්මැස්සෝ ටිකක් අන්තිමට දා ගන්න පුළුවන්.
- ඒ වගේම තම්බන කොට කූනිස්සෝ හරි උම්බලකඩ හරි දාලා තම්බලත් හදා ගන්න පුළුවන්.
- තක්කාලි වලට අකමැති නම් තම්බන කොට ගොරක කෑල්ලක් දාලා තම්බ ගන්න. (නැත්තම් ඇඹුල් ජාති මුකුත් නොදා තම්බ ගෙන මලවලා ඉවර වෙලා අන්තිමට දෙහි යුෂ ටිකක් රස අනුව දා ගන්නත් පුළුවන්.)
- මලවන කොට තෙල් ටිකකුත් දාලා මලව ගන්නවා නම් රස තව ටිකක් වැඩි කර ගන්න පුළුවන්.
- කොච්චි වෙනුවට අමු මිරිස් කරල් ගන්නත් පුළුවන්.
මේ තියෙන්නෙ අපි හැමෝම දන්න තිබ්බටු.
