අපි හැමෝම වගේ දඹල කිරට උයාගන්න නම් දන්නවනේ.. ඔන්න දැන් කියලා දෙන්න යන්නෙ දඹල මැල්ලුමක් හදාගන්න විදිහ. බලන්නකෝ එහෙනම් මැල්ලුම හදන විදිහ.
අවශ්‍ය දේවල්:
- ළපටි දඹල 250g
- ගා ගත් පොල් ටිකක් (අඬු කෝප්ප ½ ක් පමණ)
- කහ කුඩු ස්වල්පයක්
- උම්බලකඩ කුඩු ටිකක්
- ගම්මිරිස් කුඩු හෝ ගම්මිරිස් ඇට ස්වල්පයක් (රස අනුව)
- සිහින්ව කපා ගත් අමු මිරිස් කරල් 2-3ක්
- සිහින්ව ලියා ගත් රතු ලූණු ගෙඩි 6-7ක්
- සුදුලූණු බික් 1
- රම්පේ
- කරපිංචා
- ලුණු (රස අනුව)
- දෙහි යුෂ ස්වල්පයක් (රස අනුව)
- පොල්තෙල් ටිකක්
සාදා ගන්නා ආකාරය:
- මුලින්ම දඹල ටික හොඳට සෝද ගෙන හීනියට කපා ගෙන පසෙකින් තියා ගන්න.
- පසුව සුදුලූණු, උම්බලකඩ, ගා ගත් පොල්, කහ කුඩු සහ ගම්මිරිස් කුඩු වංගෙඩියට දමා හොඳින් කොටා ගන්න. (නැත්නම් මිරිස් ගලේ අඹරා ගන්න.)
- දැන් සුදුසු භාජනයක් ලිප තබා එයට තෙල් ටික දා ගෙන සාමාන්‍ය ගින්දරේ රත් වෙන්න තබන්න.
- තෙල් රත් වී ගෙන එන විට එයට රම්පේ හා කරපිංචා එකතු කරන්න.
- කරපිංචා ටික යන්තමින් බැදී ගෙන එන කොට එයටම රතු ලූණු හා අමු මිරිස් එකතු කරන්න.
- රතු ලූණු ටික මෘදු වී ගෙන එන විට ලිපේ ගින්දර අඩු කර එයට දඹල ටික දමා ගෙන කලවම් කර ටික වේලාවක් මද ගින්නේ පිස ගන්න.
- ඉන් පසුව එයට කොටා ගත් / අඹරා ගත් පොල් මිශ්‍රණය එකතු කර ගන්න.
- එයටම රස අනුව ලුණු එකතු කරන්න.
- පසුව තෙත ගතිය හිදෙන තුරු පිස ගෙන ලිපෙන් බා ගන්න.
- ලිපෙන් බා ගත් පසුව දෙහි යුෂ ස්වල්පයක් එකතු කර රස විදින්න.
වැදගත්:
- මැටි වලදක් භාවිතා කරන්න හැකි නම් වඩාත් සුදුසුයි.
- කැමති නම් දෙහි යුෂ නොදා ඉන්න පුළුවන්.
ළපටි දඹල හින්දා, මැල්ලුමක් හදපුවහම හරිම රසයි.
