මීට කලිනුත් අපේ මේ ඉවුම් පිහුම් ඇප් එකේ "අඹ මාළු" හදන විදිහ කියලා දීලා තියෙනවනෙ. ඔන්න අද අඹ මාළුවක් හදන්න තවත් ක්‍රමයක්. සීනි, උම්බලකඩ එහෙම දාලා තමයි හදන්නෙ.
අවශ්‍ය දේවල්:
- පැහී ගෙන එන අමු අඹ ගෙඩි 4-5ක් පමණ (500g)
- ලියා ගත් රතු ලූණු ගෙඩි 6-8ක් පමණ
- රම්පේ
- කරපිංචා
- කපා ගත් අමු මිරිස් කරල් 2-3ක්
- මිරිස් කුඩු තේ හැදි 2ක් පමණ (රස අනුව අඩු වැඩි කර ගන්න)
- කහ කුඩු තේ හැදි ¼ ක් පමණ (රස අනුව අඩු වැඩි කර ගන්න)
- බැදපු තුනපහ කුඩු තේ හැදි 1ක් පමණ (රස අනුව අඩු වැඩි කර ගන්න)
- ගම්මිරිස් කුඩු ස්වල්පයක් (යන්තමින්)
- බැද ගත් උළුහාල් ඇට ස්වල්පයක් (යන්තමින්)
- අබ ඇට ස්වල්පයක්
- කුරුඳු පොතු කැබැල්ලක්
- ලුණු (රස අනුව)
- සීනි මේස හැදි 1-2ක් පමණ (රස අනුව අඩු වැඩි කර ගන්න)
- උම්බලකඩ කෑලි ටිකක්
- පොල්තෙල් ස්වල්පයක්
- මීටි කිරි අඬු කෝප්ප 1 ¼ ක් පමණ
- දිය කිරි අඬු කෝප්ප ¾ ක් පමණ
සාදා ගන්නා ආකාරය:
- අඹ ටික හොඳින් සෝදා පිරිසිදු කර ලෙල්ල පිටින්ම දික් තීරු ලෙස කපා ගෙන බදුනකට දමා ගන්න.
- එයටම කහ කුඩු, මිරිස් කුඩු, බැදපු තුනපහ කුඩු හා ගම්මිරිස් කුඩු දමා අත ගා ගෙන පසෙකින් තබා ගන්න.
- දැන් මැටි වලඳක් හෝ සුදුසු භාජනයක් ලිප තබා ගෙන එයට තෙල් ටික දමා ලිප තබා ගන්න.
- තෙල් ටික රත් වී ගෙන එන විට එයට රම්පේ, කරපිංචා, කුරුඳු පොතු කැබැල්ල සහ රතු ලූණු එකතු කර ටිකක් බැදෙන්න හරින්න.
- ඒවා යන්තමින් රන්වන් පාට වී ගෙන එන විට එයටම අබ ටික එකතු කර පියනකින් වසා ගෙන අබ පුපුරවා ගන්න.
- අබ පිපිරුනු පසුව එයට පහේ අත ගා ගත් අඹ ටික එකතු කර හොඳින් කලවම් කර විනාඩියක් පමණ පියනෙන් වසා තබන්න.
- දැන් එයට උම්බලකඩ, අමුමිරිස්, උළුහාල් ඇට හා දිය කිරි ටික එකතු කර විටින් විට හැදි ගාමින් පිස ගන්න.
- පසුව දිය කිරි නටා ගෙන එන විට එයට රස අනුව ලුණු එකතු කර ගන්න.
- අඹ හොඳින් තැම්බී කිරි හිඳී ගෙන එන විට එයටම මිටි කිරි ටික ද මිශ්‍ර කර උතුරන තෙක් හැදි ගාමින් අඩු ගින්දරේ පිස ගන්න.
- ඉන් පසුව රස අනුව සීනි ටික ද එකතු කර ගන්න.
- අවසානයේ දී කිරි හිඳෙන තුරු හෝ ඔබට අවශ්‍ය ප්‍රමාණයට හොද්ද උකු වන තෙක් පිස ගෙන ලිපෙන් බා ගන්න.
