අවශ්‍ය දේවල්:
- හොඳින් ඉදුනු තක්කාලි සාමාන්‍ය ප්‍රමාණයේ ගෙඩි 2-3
- රට ලූණු ගෙඩි ½ පමණ
- අමු මිරිස් කරල් 1
- සුදු ළූනු බික් 4-5
- ඉඟුරු කැබැල්ලක්
- උකු පොල් කිරි කෝප්ප 1
- පොල් තෙල් ස්වල්පයක්
- අබ තේ හැදි ½
- සූදුරු තේ හැදි ½
- මාදුරු තේ හැදි ½
- වියළි මිරිස් කරලක්
- කරාබු නැටි 3
- කුරුඳු පොතු කැබැල්ලක්
- මිරිස් කුඩු තේ හැදි 1
- තුන්පහ කුඩු තේ හැදි 1 ½
- ගම්මිරිස් කුඩු තේ හැදි ½
- කහ කුඩු තේ හැදි ½ කට ටිකක් අඩුවෙන්
- ලුණු (රස අනුව)
- සීනි තේ හැදි ¼ කට වඩා අඩු ප්‍රමාණයක්
සාදා ගන්නා ආකාරය:
- තක්කාලි ගෙන කොටුවට කපා ගන්න.
- ලූණු, අමු මිරිස් හා සුදුළූනු ලියා ගන්න.
- ඉඟුරු කැබැල්ල තලා ගන්න.
- භාජනයක් ලිප තබා එයට තෙල් දමා ගෙන තෙල් රත් වන විට අබ, සූදුරු හා මාදුරු දමා ගන්න.
- විනාඩියක් පමණ ගිය පසු එයට වියළි මිරිස් කරලක් දෙකට කඩා ගෙන එක් කරන්න.
- දැන් කරාබු නැටි සහ කුරුඳු පොතු කැබැල්ල එයටම එක් කර ගන්න.
- එය විනාඩි 2-3ක් බැදුනු පසුව ඉඟුරු හා සුදුළූනු එක් කර කවලම් කරන්න.
- තවත් විනාඩි 2-3 කින් එයට ලූණු සහ අමු මිරිස් එකතු කරන්න.
- දැන් සියල්ල හොඳින් කවලම් කර රන්වන් පාට වන ඒට කපා ගත් තක්කාලි ටික එකතු කරන්න.
- දැන් එයට මිරිස් කුඩු, තුන්පහ කුඩු, ගම්මිරිස් කුඩු, කහ කුඩු සහ රස අනුව ලුණු දමා ගෙන සාමාන්‍ය ගින්දරේ තක්කාලි වල උනන වතුරින්ම තැම්බෙන්න ඉඩ හරින්න.
- විනාඩි 15 ක් පමණ යන විට තක්කාලි හොඳින් තැම්බී වතුර ගතිය හිදී තිබෙන විට එහි ලුණු ඇඹුල් ගතිය රස බලා පරීක්ෂා කරන්න.
- ඇඹුල් ගතිය වැඩියි නම් සීනි තේ හැදි කාලකටත් වඩා අඩු ප්‍රමාණයක් එක්කර කවලම් කර ගන්න, අවශ්‍ය නම් සීනි එක් නොකර සිටින්න.
- ළුණු රස අඩු නම් තව ලුණු ස්වල්පයක් දමා ගන්න.
- දැන් හැන්දෙන්ම තැම්බුනු තක්කාලි ටික මදක් පොඩි/චොප් කර ගන්න.
- අවසානයේ දී පොල් කිරි එක් කර උතුරන විට ලිපෙන් බා ගන්න.
වැදගත්:
- ඉදියාප්ප සහ පාන් සඳහා රසවත් හොද්දකි.
- බත් සඳහ යොදා ගන්නවා නම් හොද්ද බස්සවා ගෙන හින්දවා ගන්න.
ලිපිය ලිව්වේ: Nilusha Dilrukshi විසින්.
