නෝකෝල් මැල්ලුමක් හදමුද? බලන්නකෝ මම හැදුවේ කොහොමද කියලා.
අවශ්‍ය දේවල්:
- නෝකෝල් ගෙඩි
- අබ
- සූදුරු
- ගම්මිරිස්
- ඉඟුරු
- සුදුළූණු
- අමු මිරිස්
- කහ
- ලුනු (රස අනුව)
- පොල්
- කරපිංචා
- මාදුරු
- වියළි මිරිස් කරල්
- ලියා ගත් ළූනු
- තෙල්
සාදා ගන්නා ආකාරය:
- නෝකෝල් පොතු හැර සෝදා පොඩි කොටු හැඩයට කපා ගන්න.
- දැන් අබ, සූදුරු, ගම්මිරිස්, ඉඟුරු, සුදුළූණු, අමු මිරිස්, කහ, ලුනු සහ පොල් වංගෙඩියකට දමා කොටා ගන්න / බ්ලෙන්ඩර් කරන්න.
- කොටා ගත්/ බ්ලෙන්ඩර් කර ගත් මිශ්‍රණය කපා ගත් නෝකෝල් වලට දමා හොඳින් කවලම් කර ගන්න.
- දැන් පෑන් එකක් ලිප තබා එයට තෙල් දමා ගෙන තෙල් රත් වන විට එයට කරපිංචා, මාදුරු සහ වියළි මිරිස් කරල් 2 ක් පමණ එකතු කරන්න.
- ඒවා බැදී ගෙන එන විට ලියා ගත් ළූනු බෑයකුත් එකතු කර කවලම් කරන්න.
- ළූනු එක් කර විනාඩි 2-3 කින් පමණ නෝකෝල් මිශ්‍රණය ද එකතු කර හොඳින් කවලම් කර පියනකින් වසා මද ගින්නේ විනාඩි 15 -20 ක් පමණ තැම්බෙන්න හරින්න.
වැදගත්:
- නෝකෝල් එක් කර තම්බා ගැනීමේදී කිහිප විටක් කලවම් කරන්න.
- අඩිය ඇල්ලිය හැකි නිසා ඒ පිළිබදව සැළකිලිමත් වන්න.
- නෝකෝල් තැම්බී මදි බවක් දැනේ නම් සහ අඩිය අල්ලන ගතිය වැඩි බවක් දැනේ නම් වතුර ටිකක් එක් කරන්න.
ලිපිය ලිව්වේ: Nilusha Dilrukshi මහත්මිය.
